ལྟས་ངན་འོངས།

༡༽
རང་སྣང་དགུང་དང་མཉམ་པའི་རི་ཁ་ནས།།
རྣམ་ཤེས་འཁྱམ་པོ་ནང་དུ་མ་བསྡུས་ན།།
སེམས་པ་རླུང་གིས་སྤུར་བའི་འཁྲུལ་སྣང་གིས།།
རང་སྡེ་ཁ་འཐོར་གཏོང་བའི་ལྟས་ངན་འོངས།།
༢༽
བློ་ཁ་དྲང་པོ་གཤིས་དང་མ་བསྟུན་ན།།
རྫུན་གྱིས་སེམས་པ་བསླུས་པའི་ཟུར་ཁ་ནས།།
ཆོས་སྲིད་གཉིས་ཀྱི་ལུགས་དང་མི་མཐུན་པའི།།
རང་སེམས་ལྟ་བ་ལོག་པའི་ལྟས་ངན་འབྱུང་།།



༣༽
རང་གི་འགན་འཁྲི་བརླགས་པའི་མི་ཡུལ་ན།།
མི་སྒེར་བློ་སྣེ་འཆལ་སྤྱོད་ཆགས་ས་ནས།།
མེས་པོའི་བཀའ་ལ་བརྩི་འཇོག་མི་བྱེད་པར།།
ལམ་དང་ལུགས་སྲོལ་བོར་བའི་ལྟས་ངན་འོངས།།
༤༽
ཕ་སྐད་ཚེ་སྲོག་ཡིན་པ་མ་ཤེས་ནས།།
འཕྲལ་བདེས་འདོད་བློ་ཁེངས་བའི་ས་མཐའ་ན།།
ཚེ་སྟོད་རིགས་ཞེན་བོར་བའི་ནག་ཉེས་དེས།།
སྐད་ཡིག་རིག་གཞུང་བརླག་པའི་ལྟས་ངན་འབྱུང་།།
༥༽
དམར་པོས་རླུང་འཚུབ་གཡོ་བའི་གྲོག་རོང་གི།།
ཁ་བ་རྡུལ་གྱིས་འབགས་པས་སྲིབ་ཁ་ནས།།
མི་སེམས་བཙན་འོག་ལུས་པའི་སྡུག་ཡུས་ཁྲོད།།
གངས་རིའི་བླ་སྲོག་ཤོར་བའི་ལྟས་ངན་འབྱུང་།།
༦༽
སྤུན་ཟླ་དགྲ་རུ་བཟུང་བའི་གཡུལ་ས་ན།།
ཆོས་ཆོལ་འཐེན་ཁྱེར་རྩོད་པའི་ངན་མཚང་ཁྲོད།།
གཞིས་བྱེས་གཉིས་སུ་འཐོར་བའི་ལམ་ཞིག་ཚུགས།།
ཀླད་པ་ནང་མཁྲེགས་བདོ་བའི་ལྟས་ངན་འབྱུང་།།
༧༽
ཕ་མཁར་གཤེད་མས་བཟུང་བའི་བཙོན་ར་ན།།
མི་བུ་དམུ་རྒོད་གྱུར་པའི་སེམས་སྦུགས་ནས།།
ཆོས་དང་འཇིག་རྟེན་བཟང་སྤྱོད་ངོ་མི་ཤེས།།
རང་མིས་རང་རིགས་བཙོང་བའི་ལྟས་ངན་འོངས།།
༨༽
ཆོས་རྒྱལ་ཕལ་ཆེར་གཤེགས་པའི་མཁར་ཤུལ་ན།།
བོད་ཕྲུག་ཕལ་གྱིས་རང་མིར་མཐོང་མི་སྤྲད།།
རང་སྡེ་ཤིན་ཏུ་གཅེས་པའི་མཁས་རྒན་ཚོར།།
སྨྱུ་གུས་དམོད་མོ་བྱེད་པའི་ལྟས་ངན་འོངས།།
༩༽
འཕྲིན་བརྡ་གློག་བཞིན་འཁྱུག་པས་མི་ཡུལ་ན།།
འཕྲུལ་གྱི་བྲན་དུ་གྱུར་བའི་སོ་མཚམས་ནས།།
ལུས་སེམས་དྲྭ་བར་ཚུད་པའི་སྟེས་དབང་གིས།།
ཞི་བདེའི་སེམས་ཁམས་འཁྲུག་པའི་ལྟས་ངན་འབྱུང་།།
༡༠༽
བདེན་དོན་ལག་ནས་ཤོར་བའི་ལོ་ནག་འདི།།
དབང་མེད་རང་སྡུག་མྱོང་བའི་ལྟས་ངན་སྟེ།།
རང་ཡུལ་གཞན་གྱིས་འཕྲོག་པའི་བཙན་གནོན་འདི།།
བསམ་པའི་ཡུལ་ལས་འདས་པའི་ལྟས་ངན་རེད།།
ཧོར་བྷ། དཀོན་མཆོག་དར་རྒྱས་ནས་ཕྱི་ལོ་༢༠༡༤ཟླ་༥ཚེས་༤ཉིན་བྲིས།