༡
དཔོན་པོའི་སེམས་པ་གནམ་གྱི་ཀ་བས་བཏེགས་ཡོད།།
བར་སྣང་སྟོང་པ་རླུང་དང་སྤྲིན་པའི་ལམ་རེད།།
མི་དཔོན་སྐུ་ངོ་སྟོང་ཆེན་མཁའ་ཡིས་བསླུས་ན།།
ཉམས་ཆུང་འབངས་ཀྱི་བདེ་སྡུག་གང་དུ་ལུས་འགྲོ།།
༢
སྲ་འཐུས་ས་ལ་རྡུལ་དང་མཉམ་པའི་འབངས་མི།།
ཐལ་རྡུལ་ལྗན་ལྗིན་ཤ་ཚུགས་གསོན་པོ་མ་རེད།།
རྣམ་ཤེས་ཁྲ་མོའི་རྟོག་དཔྱོད་ཤི་ནས་བསྡད་ན།།
རྗེས་ལུས་མུན་པའི་ཀློང་ནས་སུ་ཡིས་སྐྱོབས་འོང་།།
༣
ཆོ་ལོའི་ཁྲི་ལ་བཞེངས་བའི་དེང་གི་བླ་མ།།
རི་བོའི་གཟུགས་འདི་ཆོས་པ་ངོ་མ་མ་རེད།།
འདྲ་མཉམ་ཕྱོགས་མེད་འགྲོ་ལ་བརྩེ་བ་མེད་ན།།
རིས་གཅོད་བློ་འདིས་སུ་ཞིག་ཕུང་ཀྲོལ་གཏོང་འོང་།།
༤༽
ས་འབུ་རྐང་གཉིས་དབུས་ཀྱི་སློབ་མ་ཆུང་ཆུང་།།
ས་ནས་སྐྱེས་པའི་ལྗོན་པའི་རྐང་འཐུང་མ་རེད།།
མེས་པོའི་ཤུལ་བཞག་འཛིན་པའི་སྤོབས་པ་མེད་ན།།
ཕ་མས་དངུལ་ཆུས་བསྐྱངས་བ་འཕྲོ་བརླག་མིན་འགྲོ།།
《ཧོར་བྷས་༢༠༡༤ ་ ༡༡ ་ ༦ ཉིན།》
No comments:
Post a Comment