མ་ལཱ་ལཱ་ལའི་ནོར་སྦེལ་ཞི་བདེའི་གཟེངས་རྟགས་བཞེས་སྐབས་ཀྱི་གཏམ་བཤད།

༼མ་ལཱ་ལཱ་ལའི་ནོར་སྦེལ་གཟེངས་རྟགས།༽ ཕྱི་ལོ་༢༠༡༤ཟླ་༡༢པའི་ཚེས་༡༠ཉིན། འཛམ་གླིང་ནང་སྙན་གྲགས་ཧ་ཅང་ཆེ་བའི་ནོར་སྦེལ་ཞི་བདེའི་གཟེངས་རྟགས་པཱ་ཀི་སི་ཐན་གྱི་བུ་མོ་མ་ལཱ་ལཱ་ལ་ཡིས་བཞེས་ཡོད། མོ་ནི་ལོ་ན་བཅུ་བདུན་ལས་སོན་མེད་ཅིང་། འཛམ་གླིང་ནང་ཞི་བདེ་གཟེངས་བསྟོད་ཐོབ་མཁན་ལོ་ན་གཞོན་ཤོས་གྲས་ཤིག་རེད། དེ་ལས་ཀྱང་དགའ་འོས་པ་ཞིག་ནི། འཛམ་གླིང་ནང་འཇིགས་བསྐུལ་བ་ཧ་ཅང་མང་པོ་འཚོ་གནས་བྱེད་སའི་ཡུལ་དེའི་ཁ་ཆེའི་ཆོས་ལུགས་པ་ཞིག་ལ་ཐོབ་པ་འདིས། འཇིགས་བསྐུལ་བ་དང་། འཇིགས་བསྐུལ་བའི་ཕྱོགས་གཏོགས་ཀྱི་མི་ངན་གང་མང་ལ་ཞི་བདེའི་བསམ་བློ་བསྐྱེད་པར་ཕན་པ་མ་ཟད། ཉམས་ཆུང་ནུས་མེད་ལ་བཙན་གནོན་བྱེད་བཞིན་པའི་སྒེར་གཅོད་རང་ལུགས་པ་རྣམས་ཁེར་རྐྱང་དུ་ལུས་པའི་ཤུགས་རྐྱེན་ཀྱང་ཐེབས་སྲིད། དེ་དག་ལ་ཞིབ་ཏུ་བསམ་ན། དཔེར་ན་རྒྱ་གར་ལྟ་བུའི་ཞི་བདེའི་རྒྱལ་ཁབ་ཀྱི་མི་ཞིག་ལ་ཞི་བདེའི་རྟགས་མ་ཐོབ་པ་ལས་ཀྱང་། འཇིགས་བསྐུལ་བ་དང་། གཏོར་བརྒོལ་བའི་དབུས་ཀྱི་དྲང་བདེན་དང་། ཞི་བདེའི་དོན་དུ་ལས་ལ་བརྩོན་བཞིན་པའི་མི་བུ་རླབས་ཆེན་རེ་ལ་ཞི་བདེའི་བཟང་བསྟོད་ཐོབ་པ་ནི། ཆེས་དགའ་འོས་པ་ཞིག་ཡིན། མ་ལཱ་ལཱ་ལ་མཚོན་ན། རང་དབང་གི་སྒོ་མང་པོ་ཞིག་གི་ཆེད་དུ་མདུན་སྐྱོད་བྱེད་བཞིན་པ་དང་། དམིགས་བསལ་ཕོ་མཆོག་མོ་དམན་གྱི་འདུ་ཤེས་མཁྲེགས་བཟུང་བྱེད་པའི་མི་རྣམས་ཀྱི་གཡུལ་ས་ནས་བུད་མེད་ཀྱི་ཐོབ་ཐང་རྩོད་པ་དང་། བསམ་བློའི་མནར་མ་སོན་པའི་ཕྲུ་གུ་ཆུང་ཆུང་མང་པོའི་ཐོབ་ཐང་རྩོད་ཅིང་། ཤེས་ཡོན་སྤྲོད་པའི་ལས་དོན་ལ་འཇུག་པ་སོགས་ནི་ཤིན་ཏུ་དགའ་འོས་པ་དང་། མོ་ལྟ་བུ་འཇིག་རྟེན་ཞི་བདེ་ལ་དུང་བ་ཟབ་ཅིང་། འཛམ་གླིང་གི་མི་རྣམས་འདྲ་མཉམ་ངང་བདེ་བར་འཚོ་གནས་དགོས་པའི་དགོངས་འཆར་འདོན་མཁན་གྱི་བསམ་བློ་བ་གཞོན་ནུ་རྣམས་ནི་ཅིས་ཀྱང་དུས་སྙིགས་འདིར་རང་ཅག་ལ་མཁོ་གལ་ཆེའོ།། དེ་བས་ཀྱང་མོ་ནི། དྲག་གནོན་ལ་ངན་གོམས་སོང་བའི་གཏུམ་སྤྱོད་རང་ལུགས་པའི་བཙན་དབང་འོག་གི་མི་ཧ་ཅང་མང་པོའི་སྐྱབས་དང་མགོན་དང་དཔུང་གཉེན་དུ་གྱུར་འདུག་པས། དེ་ལ་ཀུན་གྱིས་དགའ་གུས་བྱེད་འོས་ཤིང་། དོན་དུ་འཛམ་གླིང་གི་ཡུལ་གྲུ་དེ་ན་ཞི་བདེའི་ཕྱོགས་སུ་གོམ་པ་ཆེན་པོ་རེ་མདུན་དུ་སྤོ་བཞིན་པ་འདིས་དྲང་བདེན་དང་། ཞི་བདེ་འདོད་པ་རྣམས་ལ་དགའ་བ་བརྗོད་པ་མི་ཤེས་པ་དང་། སྤྲོ་སེམས་དཔག་ཏུ་མེད་པ་རེ་སྦྱིན་པར་བྱེད་ངེས་ཡིན་ནོ་སྙན་མོ།། (ཧོར་བྷས་༢༠༡༤་༡༢་༡༠ཉིན།)
 https://youtu.be/NtzGhrR5IqU