སྔགས་བསྟན་ལ་བསྟོད་པ་རང་བྱུང་སེམས་ཀྱི་འགྱུར་ཁུག།༽

༡༽

མདོ་སྔགས་ཆོས་ཚུལ་དགོངས་པའི་རྩལ་ཆེན་རྫོགས་ཏེ།། ཕ་ཆོས་རིན་ཆེན་ནོར་ལ་དབང་སྟོབས་འབྱོར་བའི།། སྟོན་པ་ཆེན་པོ་མཚོ་སྐྱེས་རྒྱལ་པོ་མཆོག་དང་།། གངས་ཅན་གཏེར་སྟོན་བརྒྱ་རྩའི་ཞབས་ལ་འདུད་དོ།།

༢༽

སྟོན་དང་བསྟན་པའི་གསུང་རབས་བདུད་རྩའི་ཡང་བཅུད།། ལུང་རྟོགས་ཆོས་ཀྱི་སྒོ་འཕར་ཡངས་པོ་ཕྱེ་བའི།། རིག་འཛིན་རྣལ་འབྱོར་དཔའ་བོ་ཌ་ཀིའི་ཚོགས་ལ།། སྙིང་དབུས་དད་གུས་བརྩེགས་མས་རབ་ཏུ་མཆོད་དོ།།

༣༽

མདོ་སྔགས་ཟུང་འཇུག་ཆོས་ཕུང་བརྒྱད་ཁྲིའི་ཉིང་བཅུད།། བསྟན་པའི་ཡང་སྙིང་ཤཱཀྱའི་ཐེག་པ་རིམ་དགུ།། འཆད་རྩོད་རྩོམ་པས་གྲུབ་པའི་ཕ་རོལ་སོན་མཛད།། སྙིགས་དུས་མུན་སེལ་སྔགས་བདག་ཚོགས་ལ་འདུད་དོ།།

༤༽

རིག་པའི་རྩལ་རྫོགས་ཚད་མའི་གདེང་སྤོབས་རྙེད་ཅིང་།། བཀའ་གཏེར་མན་ངག་རིགས་བརྒྱའི་མཛོད་ཆེན་བརྟོལ་ཏེ།། བླ་མེད་འོད་གསལ་སྙིང་པོའི་རང་རྩལ་གྲོལ་བའི།། རྨད་བྱུང་རྫོགས་ཆེན་བརྒྱུད་པའི་ཚོགས་རྣམས་མཆོད་དོ།།

༥༽

གངས་ཅན་མུན་པའི་ཉིན་མོ་གསལ་བའི་སྒྲོན་མེ།། མཁན་སློབ་ཆོས་གསུམ་སྤྲུལ་པའི་གཏད་རབས་རྣམས་ཀྱི།། བཀའ་དྲིན་དྲན་བཞིན་ཨོ་རྒྱན་རྒྱལ་ཚབ་རྣམས་ལ།། བསྟན་པ་ཡུན་དུ་གནས་པར་གསོལ་འདེབས་ཞུའོ།།

༦༽

མདོ་ལུགས་ཤེས་ཙམ་གསང་སྔགས་རྒྱང་དུ་དོར་བའི།། ཐེག་དགུའི་ཆོས་ཀྱི་དགོངས་དོན་སེམས་ཀྱིས་མི་ཟིན།། དུག་ལྔའི་གཟིར་ཞིང་ཆོས་ལ་རིས་སུ་གཅོད་པའི།། མུན་མཐར་འཁྱམ་རྣམས་ངན་འགྲོའི་གཡང་ལས་བསྒྲོལ་མཛོད།།

༧༽

ཐེག་པ་མཆོག་གི་ཡང་སྙིང་གཅིག་ཏུ་རྟོགས་ཤིང་།། བསྟན་པའི་གཞི་མ་དམ་ཚིག་གཙུག་ལ་བཀུར་བའི།། མདོ་སྔགས་ཆོས་ཚུལ་བྱེ་བའི་མཛོད་ཀྱི་མངའ་བདག། མེས་པོའི་ཕ་ཁོལ་རིག་འཛིན་ཚོགས་ལ་བསྟོད་དོ།།

༨༽

བསླབ་གསུམ་དམ་སྡོམ་་སྲོག་གི་ཀ་ཆེན་མ་འགྱེལ།། སྒྲུབ་བརྒྱུད་བརྒྱད་ལ་དད་གཙང་མོས་གུས་མ་འཆུག།། བསྟན་པ་འགལ་མེད་བསྟན་པའི་གནད་ཀུན་མཁྱེན་པའི།། སྔགས་འཆང་རལ་པ་ཅན་རྣམས་རྟག་ཏུ་མཆོད་དོ།།

༩༽

ཡུན་རིང་ལོ་རྒྱུས་མདོ་སྔགས་ཆོས་ཀྱིས་བསྐྱངས་ཏེ།། ནག་ནོག་བསམ་སྦྱོར་ནང་རྩུབ་སྲིད་ལ་མི་དགྱེས།། མཉམ་གནས་འགྲོ་བའི་དོན་ལ་ཉིན་མཚན་བརྩོན་པའི།། བྱང་སེམས་མཐར་ཕྱིན་སྔགས་རིགས་ཚོགས་ལ་འདུད་དོ།།

༡༠༽

ཉམས་རྟོགས་རིག་པའི་རྩལ་ཆེན་ཡང་ཡང་རྫོགས་ཤིང་།། འདི་ཕྱི་གཏན་བདེ་གདོད་མའི་བཙན་ས་ཟིན་ལ།། སྲོག་སྡོམ་ཟེར་བཞིའི་གྲུབ་པའི་རྟགས་མཚན་མོད་པའི།། སྔགས་བསྟན་འདི་ཉིད་ད་དུང་ཡུན་གནས་ཤོག་ཅིག།

🏾ཧོར་བྷས་༡༨༴༠༢༴༢༥ ཉིན་ལ།