ཀ་ཁའི་གླུ་ཆུང་།༽

 ༡༽

ཀ་ཁ་ག་ངའི་བདག་པོ་མིང་སྲིང་ཚོ།།

 ཅ་ཅོས་འུར་ཟིང་ཁོ་ནའི་ཁེ་དཔོག་དོན།།

 ཆ་ལུགས་གཞན་དང་བརྗེས་ནས་མི་འདུག་པར།།

ཇ་ཡུན་ཙམ་མིན་རྒྱུན་དུ་རིག་གཞུང་སྐྱོངས།།

༢༽

 ཉ་སོགས་དུད་འགྲོ་གསོད་པའི་ཤན་པ་ཚོ།།

 ཏ་ཐ་ག་ཏའི་བསྟན་ལ་མ་དད་རུང་།།

 ད་ལྟའི་མི་ཆོས་སློབ་གསོ་མི་འདོར་བར།།

 ན་རྒས་ཀུན་ལ་ཡོད་པས་བག་ཡོད་བྱོས།།

 ༣༽

 པ་ཕ་མེས་པོའི་ཤུལ་གྱི་ན་གཞོན་ཚོ།།

 བ་གམ་ཁང་པར་སྐྱིད་ཉལ་མི་གཙོ་བའི།།

 མ་ལོའི་བཀའ་དྲིན་སྣང་མེད་མི་འཇོག་པར།།

 ཙ་རི་གནས་ལས་ལྷག་པའི་ཕ་ཤུལ་ཟུངས།།

༤༽

 ཚ་གྲང་དུས་བཞིའི་ཁྲོད་ཀྱི་མིང་སྲིང་ཚོ།།

 ཛ་ལང་སྤྱོད་ངན་གསར་འགྲོག་མི་ཆེ་བར།།

 ཝ་ལེར་ལམ་བཟང་སྟོན་པའི་མཁན་པོ་ལ།།

 ཞྭ་མོ་ཕུད་ནས་གུས་ལུགས་ཤེས་པར་མཛོད།།

 ༥༽

 ཟ་འོག་དར་གོས་ཁུག་གི་སྐུ་ངོ་ཚོ།།

 འ་ཅག་བོད་ཀྱི་གནས་སྟངས་ཛ་དྲག་ནང་།།

 ར་རིའི་བློ་སེམས་སྒོར་ལ་མི་གཡེང་བར།།

 ལ་རྒྱའི་སྙིང་སྟོབས་བསྐྱེད་པའི་དམ་བཅའ་ཞོག།

༦༽

ཤ་ཁྲག་རུས་གསུམ་གཅིག་པའི་བོད་པ་ཚོ།།
ས་འབུ་ང་ཚོའི་ལོ་རྒྱུས་སྐྱུར་མོ་འདི།།
ཧ་མི་གོ་མདོག་སྤྲེལ་ལད་མི་འཁྲབས་པར།།
ཨ་ཕོའི་རྣམ་དཔྱོད་རང་རེའི་ཆེད་དུ་རྡོར།།

ཧོར་བྷ། དཀོན་མཆོག་དར་རྒྱས་ནས་(སེམས་སོང་)ཁ་པར་ངོས་སུ་ཕྱི་ལོ་༢༠༡༣ལོའི་ཟླ་༡༠པའི་ཚེས་༢༥ཉིན་གྱི་དགོངས་མོར་རྣམ་གླིང་གྲྭ་ཚང་རང་ཤག་ཏུ་བྲིས།