རྒྱ་གར་གྱི་རང་བཙན་ཉིན་མོ་སྲུང་བརྩི།

འཛམ་གླིང་ནང་རིག་གཞུང་གི་བང་མཛོད་དང་། ཞི་བདེའི་ལམ་མཁན་གྱི་ཕ་ཡུལ། བདག་ཅག་གི་སྟོན་པ་སངས་རྒྱས་བཅོམ་ལྡན་འདས་སངས་རྒྱས་སའི་གནས་མཆོག ཁ་བའི་ལྗོངས་སུ་འཕགས་པའི་ཡུལ་ཞེས་སྙན་པའི་གྲགས་པ་ཕྱོགས་གང་སར་ཁྱབ་མྱོང་བའི་རྒྱ་གར་ལ་མཚོན་ན། དེ་རིང་ནི་དགའ་སྤྲོ་ཤིན་ཏུ་འཕེལ་འོས་པའི་དུས་བཟང་ཞིག་སྟེ། རང་བཙན་ཐོབ་ནས་མི་ལོ་༦༧ སོན་པའི་ཉིན་མོ་ཁྱད་པར་ཅན་ཞིག་ཡིན། དེ་ཡང་དུས་རབས་༡༩ པ་ཙམ་ནས་ཕྱི་ལོ་༡༩༤༧ བར་མི་ལོ་༢༠༠ ལྷག་ཏུ་འབྱིན་ཇི་གོང་མ་རྒྱ་གར་ནང་བཙན་འཛུལ་བྱས་ཤིང་། གནའ་བོའི་བོད་ཀྱི་ཁྱིམ་མཚེས་སྟོབས་ཆེན་རྒྱལ་ཁབ་རྒྱ་གར་བ་རྣམས་དབྱིན་ཇིའི་འོག་མི་ལོ་ཉིས་བརྒྱ་ལྷག་ཅིག་གནས་དགོས་བྱུང་ན་ཡང་། རླབས་ཆེན་གྱི་དབུ་ཁྲིད་རྣམས་དང་དཔའ་ངར་ལྡན་པའི་མི་མང་ཚོས་དཀའ་བ་བརྒྱ་ཕྲག་སྤྱད་པའི་མཐར་དངོས་སུ་ཕྱི་ལོ་༡༩༤༧ ལོའི་ཟླ་༨ པའི་ཚེས་༡༥ ཉིན་རྒྱ་གར་ལ་རང་བཙན་ཐོབ་པ་ཡིན་ལ། དུས་བཟང་དེ་རྒྱ་གར་བ་ལ་མཚོན་ན་རང་གི་མི་རིགས་དང་རྒྱལ་ཁབ་རང་ལག་ཏུ་སོན་ནས་དགའ་སྐྱིད་སྤྲོ་གསུམ་གྱིས་ཁེངས་བའི་ཉིན་མོ་ཞིག་རེད། དེ་ལྟར་དེ་རིང་ཡང་ཕྱི་ལོ་༢༠༡༤ ལོའི་ཟླ་༨ ཚེས་༡༥ ཉིན་སྐྱར་དུ་དུས་བཟང་དེ་རྗེས་དྲན་བྱེད་པའི་བསྐལ་བཟང་གི་ཉིན་མོ་ཁྱད་པར་ཅན་ཞིག་ཡིན་པས། སྙིང་ནས་ཁོང་ཅག་ལ་བཀྲ་ཤིས་བདེ་ལེགས་ཞུ་བཞིན་ཡོད་དོ།། ཧོར་བྷས་༢༠༡༤་༨་༡༥ཉིན།