༢༽
རྒས་པའི་རི་མོ་ཐོད་པའི་སྟེང་དུ་དོད།།
རྒུད་པའི་མཚན་མ་ལུས་ཀྱི་ལྷུ་རུ་ཆགས།།
ཉམ་པའི་བརྡ་རྟགས་སེམས་ཀྱི་གཤིས་སུ་ལྷུང་།།
མི་རྐྱང་གཤིན་ཡུལ་འགྲིམ་པའི་སྔོན་བརྡ་འབྱོར།།
༢༽
གནག་སྣུམ་སྐྲ་ལོའི་འདབ་ན་དཀར་འོད་འཚེར།།
མཛེས་པའི་གདོང་ལ་མ་བསྡུས་གཉེར་མ་འདུས།།
གོམ་པའི་རྡོག་སྣེ་དབང་མེད་གཅིག་ཏུ་དལ།།
མི་རྐྱང་གཤིན་ཡུལ་འགྲིམ་པའི་སྔོན་བརྡ་འབྱོར།།
༣༽
སྨྲ་བའི་ངག་ལ་རྙིང་པའི་འདར་ཆ་ཙེར།།
དམའ་མོའི་སྐད་བརྡ་རྣ་བའི་ཕྱི་རུ་ཡལ།།
ཞིམ་པོའི་ཟས་མཆོག་ལྟོ་བར་འཇུ་མི་ནུས།།
མི་རྐྱང་གཤིན་ཡུལ་འགྲིམ་པའི་སྔོན་བརྡ་འབྱོར།།
༤༽
སྤུན་ཉེ་གྲོགས་ཀྱིས་ནུས་མེད་གྲལ་དུ་འཇོག།
ཕུང་པོའི་ཁམས་སུ་ན་ཟིག་གྲངས་མང་ལྡང་།།
འདས་པའི་སྣང་བ་རྨི་ལམ་ཚིགས་སུ་ཟློ།།
མི་རྐྱང་གཤིན་ཡུལ་འགྲིམ་པའི་སྔོན་བརྡ་འབྱོར།།
ཧོར་བྷས་༢༠༡༤/༨/༡༤ ལ་བྲིས།
No comments:
Post a Comment