༡༽མེ།
བརྩེ་དུང་དམར་པོའི་མེ་རྟགས་ཡར་ཐེངས་གཅིག་གིས།།
མི་སེམས་ཆུང་ཆུང་འབྱུང་བ་མེ་ཡིས་ཚིག་ཏེ།།
སྟག་ཤར་གཞོན་པ་ཉིན་མཚན་སྡོད་མི་བཟོད་པར།།
སྲིང་ལམ་ཡན་ཆད་མི་ཚོགས་འུར་ལ་བསྒྱུར་སོང་།།
༢༽ཆུ།
ཤིན་ཏུ་མཛེས་པའི་བུ་མོ་ཆུ་མིག་མཚོ་མོ།།
སྟག་ཤར་གཞན་གྱི་མཚོ་རླབས་འཆིར་འགྲོས་ཤིག་གིས།།
མཚོ་མོ་མིང་ཅན་ཆུ་ཐོག་ཆུ་ལ་བཞག་འདྲར།།
དབང་མེད་གཞན་གྱིས་བསླུས་ཏེ་མངོན་མེད་གྱུར་འདུག།
༣༽ས།
མི་རྐྱང་འཁྱམ་པོ་ཁང་ཤུལ་གྱང་ཧྲིལ་འདྲ་དེ།།
ཉིན་ཞག་དུ་མར་འགུལ་མེད་ཀྲོང་ངེར་ལུས་ཤིང་།།
བཟོད་མེད་སྡུག་གི་མུན་པ་ཐེགས་མེད་ཁུར་ནས།།
རྒྱུས་མེད་ཡུལ་དུ་སྲ་འཐས་ས་དང་འདྲེས་སོང་།།
༤༽རླུང་།
བུ་མོ་མཚོ་མོའི་དེང་རབས་གཚོ་བ་གསར་པ།།
སྤྲོ་སྐྱིད་ལྡན་པའི་ལྷོད་གཡེང་མཚོ་ལྟར་འཁྱིལ་ཡང་།།
བུ་ཆུང་རྡོ་རྗེའི་རྣམ་ཤེས་རླུང་དང་འགྲོག་ཏེ།།
ངེས་མེད་ཡུལ་ལ་དལ་གྱིས་འདུར་དགོས་བྱུང་སོང་།།
འདོན་སྤེལ།:
༢༠༡༡/༠༣/༢༨ ཉིན།
No comments:
Post a Comment